Lasterketako sailkapena

Hemen kontsulta dezakezue II. Zumaia Flysch Trailen sailkapena.

II. Zumaia Flysch Trailen argazki galeria

Hemen dituzue II Zumaia Flysch Trail lasterketako 800 argazki inguru. Argazki erreportaje hau Distira Argazki Elkarteko ondoko argazkilariek egin dute: Imanol Manterola, Oliver Perez, Joxe Etxabe, Idoia eta Leire Zearreta, Arnaitz Rubio Aprea, Peio Romatet, Marian Zubia eta Gorka Zabaleta.

Raul Garciak eta Ana Condek irabazi dute II Zumaia Flysch Trail, biek lasterketako marka eginez

flyschtrail-599.jpg Goi mailako mendi lasterketa jokatu da gaur Zumaian. Iazko estreinako edizioa bikaina izan bazen, aurten beste koska bat egin du gora Zumaia Flysch Trailek. Batetik, parte-hartzaile kopurua antolatzaileek jarritako 400eko mugatik oso gertu egon delako: 360. Bestetik, iazko markak ondu dituztelako ia kategoria guztietan. Gizonezkoen lasterketan Aitor Osa lanak eman dizkio Europako txapeldun Raul Garciari. Lasterketa abiadura bizian abiatu da eta laster jarri dira faboritoak buruan . Aitor Osa aurrean tiraka eta Raul Garcia nahiko gertu. Sakoneta parean biak ziren buruan, baina Mendata inguruan Aitorrek aurrera egitea erabaki du, Garcia atzean utziz. Zumaiara bidean, bi minutuko aldea ere izan du itziartarrak, baina Garcia ez da urduri jarri. Indarrak hobeto neurtu ditu eta Talaimendi iritsi baino lehen harrapatu du Osa. Azken igoeran aise egin du hanka Garciak, indarrez osoago iritsi dela agerian utziz. Helmugan, 1:51:44ko denbora egin du Raul Garciak, iaz berak ezarritako marka (1:54:31) onduz. Bigarren Aitor Osa helmugaratu da, hau ere iazko marka baino azkarrago: 1:53:32.

Emakumezkoetan berriz, Ana Conde gasteiztarra izan da onena. Blanca Serrano Espainiako txapelduna zen faborito nagusia, baina Condek lasterketa bikaina egin du, indarra oso ondo neurtuz. Ibilbidea ez zuen ezagutzen, eta horregatik lehen kilometroetan atzean gelditu da, indarrak gordetzeko asmotan. Baina seigarren kilometrotik aurrera pixkanaka aurkari guztiak gainditu ditu eta lasterketa bikaina osatu du. Oihana Kortazarrek iaz egindako marka (2:22:18) ontzeko gauza izan da, gainera: 2:19:08. Bigarren Nerea Amilibia izan da eta Blanca Serrano hirugarren.

Zumaiarren artean, Pedro Etxeberria eta Leire Atxutegi izan dira onenak. Pedro zortzigarren izan da sailkapen nagusian (2:05:39) eta Euskadiko Kopako sailkapen nagusian hiru onenen artean segitzen du proba baten faltan.

Erreakzioak:

Raul Garcia: “Lasterketa oso azkar abiatu da, azkarregi nire iritziz. Lehen aldapatxoan jada jendea tiraka hasi da eta nik erabaki dut nire erritmora joatea, gehiegi behartu gabe. Gero Aitor Osa eta biok joan gara buruan, berak hanka egitea erabaki duen arte. bi minutuko aldea atera didala esan didate lasterketan bertan, baina nik banekien harrapatzeko aukera nuela, denboraren poderioz indarrak oso ondo neurtzen ikasi dudalako. Eta hala izan da. bueltan pixkanaka gerturatzen joan naiz, eta ermita pasa ondoren -San Telmo- bertan zegoela ikusi dut. Azken igoera baino lehenxeago -Talaimendi- bat egin dugu eta aldapan gora azkenean atzean gelditu da. Oso pozik nago, gainera marka ere ondu dugulako”.

Aitor Osa: “Nik esan nuen Garciari iaz baino lan gehiago ematen saiatuko nintzela. Irabaztea banekien oso zaila zela, baina uste dut aurten estuago hartu dudala. Bi minutuko aldea nuela esan didatenean pentsatu dut aurrena iristeko aukera nuela, baina garbi dago berak oso ondo dakiela indarrak neurtzen eta nik berriz urtebete baino ez daramat saltsa honetan eta asko dut oraindik ikasteko. Baina espero dut datorren urtean oraindik hobeto egingo dudala. Pozik nago egindako lanarekin”.

Ana Conde: “Niretzat lehen aldia da lasterketa honetan, eta esan behar dut harrituta nagoela antolakuntzarekin. Ibilbidea asko gustatu zait, oso azkarra da, eta nabarmentzekoa da dena oso ondo markatuta dagoela eta ibilbide osoan dagoela jendea laguntzeko, edateko eta jateko postuak. Bikaina iruditu zait. Ibilbidea ezagutzen ez nuenez, hasieran lasaiago joatea erabaki dut, baina seigarren kilometrotik aurrera hasi naiz erritmoa bizitzen eta lasterketa bururaino iritsi naiz. Egia esan oso gustura joan naiz ibilbide osoan”.

360 korrikalarik eman dute izena

Atzo itxi zen II. Zumaia Flysch Trail mendi lasterketan parte hartzeko izena emateko epea, eta 360 izango dira aurtengo korrikalariak, iaz baino 100 korrikalari gehiago.

66 dortsal baino ez dira gelditzen

Ostegunean itxiko da II. Zumaia Flysch Trail mendi lasterketak izena emateko epea, eta jadanik 334 dira parte-hartzaileak. Kontuan hartuta gehienez 400 korrikalari onartuko direla, beste 66rentzat baino ez da gelditzen lekua. Beraz, parte hartzeko asmoa izanez gero, lehenbailehen izena ematea da onena, www.herrikrossa.com helbidean.

II. Zumaia Flysch Trail mendi lasterketa

Uztailaren 11n jokatutako da Zumaia Flysch Trail mendi lasterketaren bigarren edizioa. Zumaia eta Deba arteko itsaslabar ikusgarrietan diseinatutako 27 kilometroko ibilbide gorabeheratsuan neurtuko dituzte indarrak korrikalariek. Joan den urteko esperientzia arrakastatsuaren bideari eusteko ahalegin berezia egin dute antolatzaileek, eta proba honek dituen lau helburu nagusietan sakontzea da aurtengo erronka.

Kirol arloa

Joan den urteko estreinako lasterketan Raul Garcia Castan Europako txapeldunaren babesa izan zuen Zumaia Flysch Trailek. Espainiarra izan zen lehen edizio hartako izar nagusia, eta txapeldun handia txundituta agertu zen lasterketaren edertasunarekin eta antolakuntzaren mailarekin. Gauzak horrela, aurten ere irteeran izango dela jakinarazi du, eta bera izango da berriro gizonezkoen proba irabazteko faborito nagusia. Baina ez da kontuan hartu beharreko korrikalari bakarra izango. Hemen izango dira, besteak beste, Aitor Osa (bigarren Zegama-Aizkorri mendi maratoian), David Garcia (laugarren Espainiako Txapelketan), Eladio Lantada (Espainiako txapeldun ohia beteranoetan), Salvador Calvo (250 kilometroko Ultra Trailen irabazlea), edota Antonio Aurelio Olivar (bosgarren Sableseko maratoian eta Espainiako mendi maratoiko zirkuitoaren irabazlea). Eta noski, horiekin batera hemen izango dira Euskadiko Koparako lehiatzen ari diren korrikalariak, Flysch Traila aurten ere puntuagarria baita.

Emakumezkoen artean, Blanca Serrano Espainiako txapelduna izango da, ezbairik gabe, proba irabazteko faboritoa. Baina kontuan hartu beharko dira, besteak beste, Monica Aguilera (Sableseko maratoia irabazi duen lehen europarra) eta Nerea Amilibia (bigarren Zegama-Aizkorrin).

Lasterketa irabazteko lehia polita espero da beraz, bai gizonezkoetan zein emakumezkoetan. Iazko parte-hartzaileen kopurua ere gaindituko dela espero dute antolatzaileek: 260 korrikalari izan ziren orduan. Eta iaz ez bezala, aurten 23 urte azpikoen maila ere jarri dute. Hauek 13 kilometroko ibilbidea osatuko dute.

Ibilbideari dagokionez, irteeran egindako aldaketa txiki bat izan ezik, iazko berbera izango da. Alondegiako lanak direla eta Erribera kalea estutu egiten denez azken zatian, antolatzaileek erabaki dute aurrena goiko kaleetatik itzuli bat egitea Angeles Sorazu kaleko aldapatik igota, tropela pixka bat luzatzeko helburuarekin. (triptikoan ikus dezakezue ibilbidea). Sub 23koen kasuan, nagusientzat diseinatutako ibilbidearen erdia egingo dute, Elorriaga auzoan berriro Zumaiarantz buelta eginez.

Herritarren parte-hartzea

Zenbait herritarren ekimenez sortutako lasterketa da Zumaia Flysch Trail, eta, bide horretan, ezinbestekoa da herritarren parte-hartzea lasterketa hau aurrera atera ahal izateko. Horrela, aurten 200 boluntariok egingo dute lan lasterketaren egunean dena behar bezala atera dadin. Horrelako boluntario talde bat ez da batere ohikoa eta antolatzaileek bereziki eskertu nahi diete lanerako erakusten duten prestutasuna.

Horrez gain, proba honek erakundeen eta enpresen babes sendoa du. Aipatu behar da guztira 14 direla antolakuntzan parte hartzen duten erakundeak, tartean Zumaiako Udala, Gipuzkoako Foru Aldundia eta Eusko Jaurlaritza; 38 direla enpresa babesleak; eta beste 26 laguntzaileak. Hauen kasuan ere antolatzaileek azpimarratu nahi dute krisi garai hauetan Zumaiako enpresek egin duten ahalegina.

Ingurumena eta turismoa

Lasterketa hau diseinatzeko orduan kontuan hartu dira biotopo babestuak ezartzen dituen baldintzak eta mugak, Zumaiak dituen ondare geologiko eta turistikoak zabaltzea baita beste helburuetako bat. Zentzu horretan, Inda Mendi elkartearen eskutik mendi irteera antolatu da lasterketaren egunean, interesa duenak inguru zoragarri hauek ezagutzeko aukera izan dezan. Eta proba amaitu ondoren, itsaslabarrak itsasontziz ezagutzeko aukera ere izango da.

Arlo soziala

Lasterketa honen ideia sortu zen unetik bultzatzaileek garbi izan zuten helburu sozial bat ere izan behar zuela. Eta horrela erabaki zuten bildutako dirua Aspanovas elkarteari ematea, minbizia duten haurrei laguntzeko. Iaz 6.000 euroko txekea jaso zuen elkarteak. Aurten biltzen den dirua Aspanogirentzat izango da, minbizia duten haurren gurasoen Gipuzkoako elkartearentzat.

Pasabani omenaldia

Ez dira hor amaitzen lasterketa honen berezitasunak. Mendiari lotutako kirolariak omentzea da beste helburuetako bat. Iaz Patxi Usobiaga eskalatzaileak jaso zuen omenaldia, eta aurten Edurne Pasaban, Alex Txikon eta Asier Izagirreri egokitu zaie. Zortzimila metrotik gorako hamalau mendiak igo dituen munduko bigarren emakumea da Edurne Pasaban, eta azken mendietan soka-lagun izan dituen Txikon eta Izagirre ere omendu nahi izan dituzte antolatzaileek. Proba hasi aurretik ohorezko aurreskua dantzatuko zaie, zinta moztu eta Keixetaren eskultura berezi bana jasoko dute.

Horrez gain, Beñat Fernandez Arroiabe sukaldariak Pasaban pintxoa sortu du mendizalearen omenez, eta lasterketaren ondoren dastatu ahal izango da.

Keixetaren eskultura

Ohiko garaikurretatik aldendu eta irabazleentzat balio berezia izango zuen sari bat nahi zuten antolatzaileek. Horrela, Keixeta artistak egindako brontzezko eskultura bana jasoko dute gizonezkoen eta emakumezkoen maila nagusietako irabazleek. Itzurungo hondartzaren horma irudikatzen du eskulturak.

Izen-ematea

Proban parte hartu nahi dutenek www.herrikrossa.com webgunean eman behar dute izena, uztailaren 5a baino lehen.

II. Zumaia Flysch Trail

Noiz: uztailaren 11n

Ordua: 10:00etan

Lekua: Zumaia

Distantzia: 27 km (sub-23, 13 km)

Markak: Gizonezkoetan, Raul Garcia Castan (1:54:31); emakumezkoetan, Oihana Kortazar (2:22:18)

Informazio gehiago: www.zumaiaflyschtrail.com

Edurne Pasaban, Alex Txikon eta Asier Izagirre mendizaleak omenduko dituzte Zumaiako II. Flysch Trail lasterketan

Edurne Pasaban eta bere espedizio-kide izan diren Alex Txikon eta Asier Izagirre mendizaleak omenduko ditu aurten Zumaiako II. Flysch Mendi Lasterketak. Maiatzaren 17an Shisha Pagmara igo ondoren, munduko hamalau zortzimilakoak zapaltzen munduko bigarren emakumea izan da Edurne Pasaban mendizale tolosarra. Zeregin horretan azken igoeretan bidelagun izan ditu Alex Txikon eta Asier Izagirre mendizaleak, eta Zumaiako II. Flysch Trail mendi lasterketak hirurei omenaldia egingo die probako egunean, uztailaren 11n. Izan ere, Zumaia Flysch Trail lasterketak urtero mendiarekin lotutako kirolari bat omentzeko konpromisoa hartu zuen iaz, lehendabiziko edizioan. Aurreko urtean, Patxi Usobiaga eskalatzailea omendu zuten eta aurten.

Proba hasi aurretik, 9:45ean, aurreskua dantzatuko diete Pasaban, Txikon eta Izagirreri, eta Zumaiako alkate Iñaki Agirrezabalagarekin batera moztuko dute probari hasiera emango dion zinta. Horrez gain, omendutako mendizaleek Keixeta eskultorearen garaikurra jasoko dute Zumaiako Udalaren eskutik. Merezimendu osoko omenaldia izango da, inondik ere.

Raul Garcia Castan eta Blanca Serrano txapeldunak II. Zumaia Flysch Trail lasterketan hartuko dute parte

Mendi lasterketetako Europako eta Espainiako txapeldun Raul Garcia Castan eta Espainiako txapeldun Blanca Serrano Zumaian izango dira uztailaren 11n Flysch Trail lasterketan parte hartzeko. Astebetera Munduko Txapelketa jokatuko dute Italian, baina Zumaiako proba ez dute galdu nahi izan. Garcia Castanek iaztik ezagutzen du lasterketa –berak irabazi zuen–, eta oso oroitzapen onak dituela adierazi digu:  “Lasterketa askotan hartu dut parte, baina kirolari eta pertsona bezala inoiz ez naute Zzumaian bezain ongi tratatu”.  Blanca Serranorentzat lehen urtea izango da, eta emakumeen lasterketaren maila igotzen lagunduko du.

Ibilbidearen bideo aurkezpena

Datorren uztailaren 11n Zumaian jokatuko den Zumaia Flysch Trail mendi lasterketaren ibilbidea aurkezteko bideoa duzue hemen. Zumaiako eta Deba arteko kostaldeko itsaslabar ikusgarrietan jokatuko da proba. Aitor Osa txirrindulari ohiak azaldu dizkigu ibilbidearen ezaugarri aipagarrienak. Lotura honetan ikus dezakezue gaztelaniazko bertsioa, Iñigo Saenz de Arguedasen azalpenekin.

2009ko lasterketaren bideoa